Baiano. ” ‘O virus”, la poesia di Paola Miele

’O virus

Stasera ’a luna
è chiena chiena;
nu panno fino fino
ll’ annasconne ’o chiarore:
è ’o velo d’ ’a malincunia.
Se sente sola,
aspetta ’e ’nnammurate,
ha capito tutto cose:
sò fernute ’e sentimente.
Luna…
nun è accussi’, nun è overo!
’O munno è malato:
nu virus ca nun se vede,
è guerra a ll’ umanità.
Tu, nun te piglià ’pena;
acala chistu velo,
fa ca ’na cuperta ’e stelle
arravoglia ’o munno sano,
nce cunnulea chianu chiano,
nce fa senti’ meno dulore,
comm ’ ’e creature ’mbraccio ’a mamma.
’A siente ’a museca
’e parole ’ e ’sti canzone?
’O core canta ’e speranza:
vo penzà ’ca tutto passarà!
Tienece cumpagnia,
’int ’e ’sti sere ’e pucundria.
’O sole nun mancarrà
nu bell juorno,
pe ’nce turnà ’a vasà
cu tutte ’e sentimente,
’int a nu munno nuovo
’e bella gente, nun cchiu’ indifferente!

Paola Miele